Presidenti i Republikës së Kosovës, Fatmir Sejdiu, me rastin e përvjetorit të dytë të pavarësisë së Kosovës ka marrë mesazhe urimi nga guvernatorja e përgjithshme e Komonvelthit të Australisë, Quentin Bryce AC si dhe nga presidenti i Kroacisë, Stjepan Mesic.

Në mesazhin e guvernatores Bryce, ndër të tjera thuhet: “Më rastin e Ditës Kombëtare të Republikës së Kosovës, dua të përcjell tek Ju, Qeveria dhe populli i Kosovës, urimet e mia të ngrohta, së bashku me ato të popullit dhe të Qeverisë Australiane”.

Është kënaqësi e madhe që Australia uron Kosovën në përvjetorin e saj të dytë si një shtet i pavarur. Siç jeni në dijeni, Australia ishte një nga vendet e para që e njohën pavarësinë e Kosovës më 19 shkurt 2008 dhe ka vendosur zyrtarisht marrëdhëniet diplomatike më 21 maj 2008. Mund të shpreh besimin tim se marrëdhëniet miqësore midis vendeve tona do të vazhdojnë të avancohen në vitin e ardhshëm”, theksohet në urim. Ndërkaq, në urimin e presidentit Mesic thuhet: “Me rastin e Ditës së Pavarësisë së Kosovës dhe përvjetorit të shpalljes së Republikës së Kosovës, unë, në emrin tim personal dhe të të gjithë qytetarëve të Republikës së Kroacisë, do të doja t’ju përcillja Ju personalisht dhe të gjithë qytetarëve të Kosovës urimet më të sinqerta”."Radio Rinia".

Pagat e punonjësve shëndetësorë janë ngritur rreth 40 %

Ministri i Shëndetësisë i Republikës së Kosovës, Alush Gashi tha të premten se që nga fillimi i mandatit të tij në krye në të këtij dikasteri më 2008, pagat e punonjësve shëndetësorë të vendit janë ngritur rreth 40 për qind.

Në një dëshmi para Komisionit Parlamentar për Shëndetësi të Kuvendit të Kosovës, ministri Gashi tha se në janar të vitit 2009 pagat e punonjësve shëndetësor janë ngritur 10 për qind, ndërsa në janar të vitit 2010 edhe për 30 për qind. Sipas kësaj rritje, paga e specialistit mjekësor në Kosovë është 390 euro, kurse paga e infermierëve është 237 euro.

Ministri, ka thënë se kjo është një ngritja e pamjaftueshme, por një start i mirë për të ecur para. Gashi është paraqitur për dëshmi në Komisionin Parlamentar për Shëndetësi të Kuvendit, bashkë edhe me ministrin e Punës e Mirëqenies Sociale Nenad Rasic, ndërsa në diskutim kanë marrë pjesë edhe anëtarët e Komisionit si dhe përfaqësuesit e Federatës Sindikale të Shëndetësisë së Kosovës dhe Sindikata e QKUK-së."Radio Rinia".

Stubb: Një ditë dua ta shoh Kosovën në BE

Kryeministri i Qeverisë së Republikës së Kosovës, Hashim Thaçi ka pritur të mërkurën në takim ministrin e Punëve të Jashtme të Finlandës, Alexander Stubb, me të cilin ka biseduar për thellimin e bashkëpunimit në mesë të Finlandës dhe Kosovës dhe për zhvillimet politike në rajon.

Kryeministri Thaçi ka informuar ministrin finlandez për rrjedhën e zhvillimeve në Kosovë, si dhe për përpjekjet e Qeverisë së Kosovës për të ndërtuar një shtet demokratik, multietnik dhe mbi bazë të sundimit të ligjit. “Perspektiva e gjithë rajonit është integrimi në NATO dhe BE”, ka thënë Thaçi dhe ka shtuar se kjo është edhe prioritet numër një i institucioneve të Kosovës.

Në takim është diskutuar edhe për raportet bilaterale në mes të Kosovës dhe Finlandës. Këto raporte, siç thuhet në një komunikatë të Kryeministrisë, do të vazhdojnë që të forcohen edhe më tepër me binjakëzimin e komunave të Kosovës me qytete të ndryshme të Finlandës dhe me këmbim përvojash dhe vizitash të ndërsjella zyrtare.

Ministri Stubb ka vlerësuar se Kosova paraqet një vend të veçantë për Finlandën, edhe për shkakun se ndërmjetësi për zgjidhjen e statusit të Kosovës ishte ish-presidenti finlandez Martti Ahtisaari. Ai ka përmendur edhe faktin se në Finlandë, aktualisht, gjenden 5 mijë shqiptarë të Kosovës që do të vazhdojnë të jenë urë lidhjeje dhe miqësie ndërmjet të dy vendeve tona.

“Kosova duhet të vazhdojë angazhimin në procesin e integrimeve evropiane. Një ditë dua ta shoh Kosovën në Bashkimin Evropian. Sundimi i ligjit është bazë për këtë”, është shprehur ministri Stubb./Radio Rinia/. 

MPJ në pritje për njohjeve të reja

Zyrtarë të Ministrisë së Punëve të Jashtme të Kosovës thonë se së shpejti priten njohje të reja të shtetit të ri. Zëvendësministrja e Jashtme, Vlora Çitaku ka deklaruar për Radion Evropa e Lirë, se MPJ ka intensifikuar kontaktet me përfaqësuesit e shteteve që ende nuk e kanë njohur Kosovën.

“Ekziston një koordinim jashtëzakonisht i fuqishëm edhe me partnerët tanë ndërkombëtarë, që numri i njohjeve të shtohet”, ka thënë Çitaku.

Çitaku, ndonëse pohon se po shfrytëzohen të gjitha kanalet diplomatike për t’i bindur shtetet hezituese që ta njohin Kosovën, ajo nuk bën të ditur se me çfarë strategjie është duke lobuar Ministria e Punëve të Jashtme./Radio Rinia/. 

Luksemburgu 8 milionë euro për dy qendra të kompetencës

Ministri i Arsimit, Shkencës dhe Teknologjisë, Enver Hoxhaj, ka udhëtuar të hënën për në Luksemburg, ku do të nënshkruajë një marrëveshje bashkëpunimi me përfaqësues të Qeverisë së Luksemburgut, për themelimin e Qendrave të Kompetencës (ekselencës) në Ferizaj dhe Prizren.

Sipas kësaj marrëveshjeje, Qeveria e Luksemburgut do mbështesë themelimin e këtyre dy qendrave me një shumë mjetesh deri në 8 milionë euro, ndërsa Qeveria e Kosovës do të investojë 1.2 milion euro në këtë projekt, fond i cili do të jetë i shfrytëzueshëm gjatë vitit 2010.

Leonora kopjon Madonnan

Së fundmi këngëtarja kosovare Leonora Jakupi ka lansuar videoklipin e këngës që mban titullin “Puthja jote”.

Një klip i punuar nga regjisori maqedonas Alexander, por nuk dimë se e kujt ishte ideja që Leonora të imitonte Mbretëreshën e muzikës pop, Madonna.

Njëra nga skenat që bie në sy te videoklipi i Leonorës, i ngjan klipit të Madonnas, “Die Another Day”.

/Radio Rinia/.